Første syning gav hakeslepp

Interimsyret med Janne Urdal Aursland i spissen, har jobba fram løysingar, sponsormidlar og i det heile har halde tak i prosjektet saman med prosjektleiar. Dei gjekk rundt i bygget med ein hale interesserte, ofte litt mållause folk etter seg.

Symjehallen i seg sjølv ser ut til å vera ei perle av sitt slag. I symjehallen kjem ljoset inn frå begge sider frå store vindauga som dekkjer begge kortsidene av bygget. Ein kan verkeleg symja og sjå på naturen på same tid.

Vassklia som er sponsa av Hatteland-konsernet var i fokus for dei fleste av dei mange ungane som var der, men óg det vesle bassenget som har ein kan tilpassa etter behov for til dømes småborn eller folk med fysiske avgrensingar

Tiltalande garderobeanlegg og ei badstove inne i sjølve bassengområdet, var òg blant mange ting folk la merke til.

Bygdahuset

Likevel var det bygdahuset som kanskje hadde vel så mykje fokus denne dagen. På denne førehandvisinga var det først og fremst folk frå Vats som var målgruppa, og då var det naturleg at det som nå skal vera storstova i bygda kom i fokus.

Det blir svært godt for ei langstrukken bygd å få ein sentral plass att, som er endå mykje betre og meir funksjonell enn den me hadde, sa dei to tjue år gamle venninnene Frida Eike og Sofie Landa, som begge forlèt bygda til hausten for å studera.

— Me er likevel så knytte til bygda, at me gler oss til å ha denne plassen når me er heime att på 17. mai og andre store dagar, seier Frida Eike.

Elles var det litt framand for dei to då journalisten spurte om dei var frå Øvre eller Nedre Vats.

— Me er frå Vats, seier Sofie Landa.

Slike fine grunnhaldningar kan den nye Vindafjordhallen og Arken tuleg bidra positivt til i åra framover.

Storsalen

Salen har ei mobil scene som kan vera stor, liten, høg og låg. Blir han tatt heilt bort er det plass til 300 gjestar rundt festborda. Er det ein konsert, vil det vera plass til 400 sitjande menneske litt etter kor stor scena treng å vera.

Storsalen kan bli delt av ei lydisolert skyvedør, som gjer at det kan vera to selskap på same tid.

— Høyr kor lite gjenklang det er i rommet, seier styreleiar Janne Urdal Aursland, når ho stemmer i ein tone som det ikkje er snev av ekko etter.

Ho fortel om svært medvitent val av materialer av omsyn til akustikk. Kjøkenet er stort, ope og moderne. Ein fin detalj er at for mindre forsamlingar treng ein ikkje å bruka storkjøkenet. I den delen innanfor inngangsdøra som ein kan kalla ein foajé eller kafe, er det eit lite kjøken kor brukaren av rommet kan stella til lettare mat sjølve.

— Før eg har vore i svømmehallen, verkar det som at huset har gjennomtenkte universelle løysingar, seier amerikanaren med norsk namn og knyting, Einar N. Bakke, frå rullestolen sin.

Bardisken er vendt begge vegar, inn mot foajeen og inn mot storsalen. Materialvalet på golvet i storsalen er tynne parkettdelar som står tett i tett. Vakkert er det, og så må ein håpa det toler tidas tann.

Ute

Frå utsida var omkvedet at det bygget er flott. Kor vakkert eit bygg med to store firkanta delar kan bli, vil vera diskutabelt, men den nedseinka delen i midten bind dei to delane fint saman. Dessutan ser fargar og materialval ut til å stå godt til kvarandre.

Det er allereie asfalt, oppmalte parkeringsplasar og plantar i rabattane utanfor. I det heile står bygget godt arkitektonisk til bedehuset Arken som jo er nesten like nytt som Vindafjordhallen.

Ein detalj som truleg ikkje var så tydeleg i den gamle Vindafjordhallen, er at området er tett knytt til Hatteland Stadion og klubbhuset til SK Vats. Så det er verkeleg ei flott klynge Vats har fått i stadionanlegget, svømmehallen, bygdahuset, bedehuset, kyrkja og skulen.

Flisfyringsanlegget er òg ein viktig del av den nye hallen. Harald Selsaas viste anlegget, og her er det tidsmessig moderne teknologi og løysingar.

Janne Urdal Aursland, som i yrkeslivet er underdirektør i Sjøfartsdirektoratet i Haugesund, er no på slutten av tida som styreleiar for Vindafjordhallen. I dag var ho på sjarmøretappa, men det er to år sidan ha gav ho beskjed om at når prosjektet er ferdig er det slutt for henne.

— Eg er nok best på dei tinga me har vore gjennom til no, seier Aursland.

No som interimstyret går over til eit vanleg styre etter den offisielle opninga i august, blir Dan Strand Jensen ny styreleiar. Helikopterpilot Jensen tar altså no snart bokstavleg talt over spakane.