Nytt liv i låven: Frå kyr til millionkunst
Etter at skrapesjuka tømde fjøsen for dyr, sat Gøril med ein tom låve og ein vill idé. No heng arbeida til dei største samtidskunstnarane i landet mellom stolpane der sauene stod.
– Altså, det eksploderte jo med ein gong. Det strøymde til med folk; både fordi det var gode kunstnarar, men truleg også det eksotiske i at nokon hadde laga eit så stort galleri i ein låve oppi ein pitte liten dal.
Gøril Guddal (64) ler framleis litt overvelda når ho fortel om våren 2014, då ho opna galleri på heimgarden i Guddal i Kvinnherad kommune. Ho hadde invitert Harald Stanghelle til å stå for den formelle innviinga og utstillingsopninga denne maidagen. Han hadde sjølvaste laurdagsrevyen med på slep.
– Utstillinga var med Håkon Gullvåg, Ørnulf Opdal og Hariton Pushwagner, og like etter kom dronning Sonja på besøk. Då var det vel rundt 1300 menneske som strøymde til her og parkerte langsmed vegane rundt om i heile dalen. Eg fekk heilt sjokk!
