Frå datainteresse – til milliardkonsern
Det heile starta ikkje som ein plan med investorar, store ambisjonar, eller med ein definert strategi. Det starta i Ølensvåg i 1986, med brørne Sigmund og Tor Erling Lunde, som tilfeldigvis fekk interessa for å driva eige selskap. Tor Erling med kvalitetsstyring og Sigmund med datateknologi.
Sigmund Lunde starta yrkeskarrieren som snikkar, før han gjekk vidare på ingeniørhøgskulen innan bygg og anlegg. Så studerte han petroleum. Broren Tor Erling var maskiningeniør, og dei begge var tilsette ved Haugesund Mekaniske Verkstad, sjølv om dei ikkje jobba direkte i lag. Dei var i ulike fagområde, og dreiv i praksis med kvar sine ting, og det var heilt tilfeldig at dei begge sa opp jobbane sine omtrent samtidig i 1986.
Det var interessa for data som snudde retning for Sigmund. Han begynte å bruka datamaskinar på jobb, og oppdaga at dette var mykje meir interessant enn den yrkesvegen han hadde valt.
— Me hadde jo begynt å bruka datamaskinar i jobben, og eg fatta stor interesse for det, seier Sigmund Lunde.
