Går i gang med biogassplan

— Formålet med planendringa er å konkretisera og opna for etablering av anlegg for biogassproduksjon frå mellom anna animalske biprodukt, fiskeslam, kjøkken- og matavfall. Under dette kjem prosess for å utvinna biometan og biokarbon (CO₂), og å ivareta biorest for omgjering til gjødsel for landbruket i fast og flytande form, skriv senior arealplanleggjar Mona Fågelklo i Arkipelet i varselet datert 23. oktober.

Varselet blei sendt til nærliggande naboar og gjenboarar, Statsforvaltaren i Rogaland, Rogaland fylkeskommune, Statens vegvesen, Haugaland brann og redning IKS, Haugaland interkommunale miljøverk, Fagne, NVE, Ølen vassverk, Arbeidstilsynet, Mattilsynet – Haugalandet, DSB, Ølen Grendeutval, Ølen Handel & Service og Fikse Næringsforening.

Kommunedirektør Yngve Folven Bergesen informerte politikarane om varselet i eit formannskapsmøte tysdag.

26,5 dekar

Planarbeidet omfattar ei endring av delar av detaljreguleringa for Nerheim næringsområde og blir gjennomført etter plan- og bygningslova. Området som blir omfatta av planendringa, ligg på Nerheim – om lag éin kilometer frå Ølen sentrum, tre kilometer frå Ølensvåg og seks kilometer frå Sandeid. Tilkomst skjer frå Fv. 514, Sandeidvegen. Endringa har ei avgrensing på rundt 26,5 dekar.

Fågelklo skriv at Biovind sine planlagde tiltak er i tråd med gjeldande kommuneplan, som viser næringsformål for areala, og delvis i tråd med gjeldande reguleringsplan, som viser lettare industri for areala.

— Det blir foreslått at nytt formål blir industri, spesifisert for biogassanlegg, skriv arealplanleggjaren.

ROS-analyse

Ved utarbeiding av gjeldande reguleringsplan for Nerheim næringsområde blei det gjennomført konsekvensutgreiing for relevante tema som naturressursar, landskapsbilete, trafikk og transport, kultur- og miljøverdiar, forhold til Eideelva og konsekvensar for næringsliv.

Planområdet er i kommuneplanen avsett til næringsformål, og reguleringsplanen er utarbeidd i tråd med kategori C i Regionalplan for Haugalandet, der formål industri inngår.

Fågelklo opplyser at det i samband med planendringa for etablering av biogassanlegg, i samråd med Vindafjord kommune, er gjort ei vurdering av tiltaket opp mot forskrift om konsekvensutgreiing. Det er vurdert at tiltaket ikkje fell inn under forskrifta, og at verknadene som blir introduserte gjennom planendringa, blir tilfredsstillande handterte gjennom ei risiko- og sårbarheitsanalyse (ROS) med tilhøyrande støttedokumentasjon.

ROS-analysen skal utformast med bakgrunn i eksisterande konsekvensutgreiing og skal inkludera vurdering av potensielle miljøkonsekvensar som støy, utslepp til luft, vatn og grunn, lukt, trafikkbelastning og eksplosjonsfare.

— Dersom analysen avdekkjer behov for avbøtande tiltak, skal desse implementerast for å redusera påverknad på ytre miljø og sikra trygg drift, skriv Fågelklo.

Tiltakshavar Biovind har i samråd med Vindafjord kommune vurdert at ROS-analysen er det mest relevante verktøyet for å identifisera og handtera risiko og påverknad knytt til det konkrete tiltaket, og at dette er i samsvar med gjeldande plan- og bygningslov og forskrift om konsekvensutgreiing.

Tek imot innspel

Saka blir varsla med tre vekers frist i lokalavisene, og det blir lagt ut komplett varslingsmateriale på Vindafjord kommune si nettside.

— Det vil bli føreteke utvida medverknad, og meir informasjon kjem når saka blir lagt ut på høyring, skriv arealplanleggjaren.

Eventuelle merknader til planendringa må sendast innan 20. november. Ved ytterlegare spørsmål kan ein kontakta Fågelklo.