Dugnad for ei god sak

I andre etasjen til Haugesund Sparebank sitt lokale i Vikedal sit Kåre Lars Tveit, leiar for Tv-aksjonen i Vindafjord, og delar ut grøne bøsser, ruteplanar, og pins til dei som skal ut å samla inn pengar. På bordet står det kaffi, saft og freistande fat med sjokoladekake. I år er det berre menn som går i Vikedal, med unntak av Anne Berit Skipevåg Tveit som måtte avløysa sin sjuke mann. Grannar slår følgje med Svein Bjarte Holten.
Stengte dørar
I Sommerhaven finn me nokre ungdommar som slappar av.
Dei me snakkar med har berre bankkort, og derfor får dei ein lapp med telefonnummeret til innsamlingsaksjonen.
Ute i gata kjem Tv-aksjon leiaren springande med ein ruteplan til Svein Bjarte Holten, som han gløymde å ta med seg.
— Ja, takk, men eg har alle dei i hovudet, ler Svein Bjarte.
Det er svært få som lukkar opp. Svein Bjarte Holten limar på lappar med telefonnummeret nesten i kvart hus.
— Dei er sikkert på bygdehuset, trur han. Der er det markering av 125-års jubileumet til Vikedal kyrkje.
— Me vert ikkje rike på denne turen, nei, smiler Holten.
Jakob Skeie er ein av tre Svein Bjarte Holten finn heime på ruta si. Han plasserar pengesetelen trygt ned i bøssa.
Gjev til ei god sak
— Kvifor gjev du pengar til Tv-aksjonen?
— Me gjev til ei god sak. I det siste har det vore mykje snakk om dette i media . Me plar å gje pengar til gode føremål, seier Jakob Skeie. Han får støtte av kona si, Berit Skeie.
— Det er spesielt kjekt å gje når det kjem folk på døra. Me gjev aldri pengar til hjelpeorganisasjonar gjennom telefon, fordi det vert på ein måte lite truverdig, seier ho.
Kjell Austrheim lukkar opp. I neven har han ein samanbrett pengelapp, som han puttar ned i bøssa. Han kvir seg ikkje for å hjelpa dei som har det vondt.
— I fjor var me ikkje heime, men me veit at de hengjer lappen på døra, seier han.
Liva Øverland opnar døra med eit stort smil, og det vert tyngre i bøssa til Svein Bjarte. På resten av ruta limar me lappar på dører og inni postkassar – det er nesten ingen som er heime.
— Er det vanleg å treffa så få heime under tv-aksjonen? spør eg Svein Bjarte, som har vore bøsseberar før.
— Det er litt vanskeleg å seia, men eg meiner å hugse det var mange fleire som var heime sist gong eg var med på innsamlinga. Eg trur dei fleste på mi rute er på bygdehuset, meiner han.