Konsulentar frå Ølensvåg-konsernet Omega AS skal bistå Jernbaneverket i utbygginga av Follobanen. Avtalen blei signert tidlegare i månaden
— Dette er ein eksklusiv avtale for Omega, og me skal levera personell innan Project Completion Management, eller ferdigstilling, i løpet av heile prosjektperioden fram til 2021, uttaler avdelingsleiar i Omega, Arvid Grønvoll.
Dette er ein eksklusiv avtale for Omega
Follobanen er det største samferdselsprosjekt i landet, og omfattar totalt 65 km nye jernbanespor. Banen vil når den er ferdig, også ha Nordens lengste jernbanetunnel på 22 km.
Døropnar
Sidan våren 2013 har Jernbarneverket også nytta seg av Omega sitt Pims Completion Management (PCM) system til utbygginga av Follobanen. Bedrifta i Vindafjord blei tildelt rammeavtalen basert på konsulentane si lange fartstid innan ferdigstilling og deira kompetanse på Pims.
— Fleire av konsulentane våre har solid erfaring med Pims-systemet etter å ha jobba med dette i mange år. I tillegg har mange av dei lang erfaring frå leiande stillingar innan ferdigstilling på store prosjekt, seier Grønvoll.
Svein Tore Haraldseid, leiar for prosjektsystem i Omega, slår fast at Jernbaneverket sitt val av både PCM, og nå også personell, er ei viktig tillitserklæring, og kan bli ein døropnar til fleire kundar av Pims.
— Utbyggingskontraktørene på Follobaneprosjektet skal også nytta Pims CMS, og me håpar å kunna få til eit breiare samarbeid med dei. Fleire aktuelle kontraktører er store i marknaden, og det blir interessant og spennande å møte dei som mulige kundar i framtida.
Verda over
Omega leverer både prosjektstyringssystemet Pims og konsulenttenester verda over, og har i dag meir enn tusen tilsette på oppdrag i over 15 land. Omega sine kundar er hovudsakeleg selskap innan olje- og gass, som blant anna Statoil, BP, Gassco, Lundin og Wintershall. I løpet av dei siste åra har kundeporteføljen også utvida seg til å omfatta selskap innan samferdsel og energi, til kundar som blant anna Sporveier, Statkraft og Hydro.
Omega har hovudkontor i Ølensvåg, og distriktskontor i Oslo, Stavanger, Bergen, Kristiansund, Trondheim, USA, Canada, Storbritannia, Litauen, Singapore og Australia. Konsernet hadde i fjor ein omsetning på 1,5 milliardar kroner.