Fatland toppar

I politisk samanheng skal kvinnerepresentasjonen helst vere minst 40 prosent, men for Vindafjord Høyre er den på under 16 prosent på vallista til kommunevalet til hausten. Ved valet for fire år sidan var kvinnedelen 22 prosent for partiet.

Årets liste vart godkjent på eit nominasjonsmøte rett før helga.

Ambisjon om ordførar

Vindafjord Høyre har peika ut Per Fatland frå Vats som ordførarkandidat på toppen av lista. Resten av lista er alfabetisk. Fatland avløyser Terje Kleiven frå Skjold som har gitt seg i kommunepolitikken

— Eg stilte meg til disposisjon og det er hyggeleg at nominasjonsmøtet gjekk inn for meg som kandidat. Når vi stiller med ordførarkandidat, er ambisjonen at Vindafjord Høyre skal få ordføraren. Etter at veljarane har sagt sitt, får vi sjå om det er realisme i det, seier han.

Vindafjord Høyre er eit opposisjonsparti i dag, og vegen til rådhuset må bli brulagd av samarbeidspartnarar.

Der utelukkar Per Fatland Senterpartiet og Sosialistisk Venstreparti, men han kan gjerne samarbeide med Frp, Ap og KrF, og for den del Bjoa bygdeliste.

— Skal det bli ei forandring, så må det bli ei reell forandring, seier han.

Lang fartstid

58-åringen frå Nedre Vats har ikkje så lang fartstid i politikken i Vindafjord, men han har nærmare 25 år bak seg i Høgre på ulike plan. Han sat to periodar i kommunestyret og formannskapet i Odda der han budde i ti år. Han driv sitt eige selskap innan rådgiving og økonomi i eit kontorfellesskap i Haugesund.

Det mest aktuelle politiske spørsmålet i nesten alle kommunar, er kommunereforma. Fatland viser til at partiet hadde spørsmålet oppe på årsmøtet før helga. Konklusjonen i partiet er at ein skal orientere seg mot vest, med unntak av Etne som kan få vere med på lasset. Ein kommune av dei fire helsekommunane; Etne, Sauda, Suldal og Vindafjord, vil ikkje partiet vite noko av. Då ser Høgre heller til Tysvær.

Ja til storkommune

— Vedtaket er at vi skal ha ei open og positiv vurdering av kommunegrenser på Haugalandet, seier den nye ordførarkandidaten.

— Også til ein storkommune på Haugalandet?

— Ja, men det avgjerande er kva Haugesund og Karmøy bestemmer seg for. Det blir neppe aktuelt utan at begge er med, seier Fatland.

Toppkandidaten har 18 andre med seg på lista, som er redusert frå 27 kandidatar ved valet i 2011, til 19 til det komande valet.

I alt 13 av dagens kandidatar stod på Høgre si liste også for fire år sidan. Vats og Skjold har så godt som halvparten av kandidatane på lista.

Svein O. Vik i nominasjonskomiteen opplyser at det er mangel på kandidatar som vil stille på liste som er årsaka til at dei har redusert lista relativt kraftig.

Vegrar seg

Han fortel at han saman med resten av nominasjonskomiteen, Gunnar Ulland og Ingunn Lothe, har arbeidde seriøst heilt sidan i mai i fjor med tanke på å få ei god liste. Men han er ikkje heilt tilfreds.

— Det er for få kvinner og nokre geografiske område er for dårleg representerte. Men det er dette vi fekk til. Det har vore uvanleg vanskeleg å få folk på banen, spesielt kvinner. Generelt sett kan det sjå ut til at sidan alt går på skinner, så treng ein ikkje bry seg, seier Svein O. Vik som er vara for partiet i kommunestyret, og han har deltatt i kommunepolitikken i ein mannsalder.

Styret i partiet har fått fullmakt til å fylle fleire namn inn på lista fram til fristen for til å levere den inn til kommunen 31. mars.