Meierplassen Arena er namnet på det nye handverkssenteret i Etne. Trygve Heggebø (t.v.), Hildegunn Åkra, Bjarte Lauareid, Rolf Øyjord, Dag Anders Hornenes og Kjetil Nedreskår er blant dei som vil ha sin arbeidsplass i bygget.
FOTO: TORSTEIN NYMOEN
Arbeidsplass for over 20
Eit av dei største lokala i Etne sentrum har stått tomt i nesten åtte år. Men no er det ny giv i bygget som blir døypt om til Meieriplassen Arena.
Med fokus på handverkartenester er målet til eigarar og leigetakarar i den gamle meierigarden i Etne at lokala skal stå fram som eit senter for både Etne, Kvinnherad, Indre Ryfylke og Haugalandet.
Komplette byggtenester
Meierigården var å rekne for eit mini-kjøpesenter tidleg på 2000-talet, med mellom anna kafé, daglegvarebutikk og frisør. Men då Etne senter opna var det ikkje lenger liv laga og lokalet har stått meir eller mindre tomt sidan då. I dag er lokala eigd av Haugli eigedom AS i Haugesund og Kjetil Nedreskår. Det var då sistnemnde drøfta moglegheiter for bygget med Dag Anders Hornenes i Fikse Renhold AS at ideane kom.
