Eksotisk festmat på menyen

Eit bognande matbord med 13 ulike hovudretter, i tillegg til eit fristande kakebord stod klart då etnebuen inntok den festpynta foajeen ved Enge skule onsdag kveld. Med festmat frå Somalia, Syria og Sudan var det duka for ei kulinarisk reise denne kvelden. Søte kaker av det litt sunnare slaget enn me er van med. Kjøtrettar av kylling, storfe og sau. Pannekaker på somalisk vis og ris i ulike variantar. Alt saman stelt i stand for å gje bygdefolket ein smaksprøve på dei ulike kulturane som representerer heimlandet til flyktningane som er busett i kommunen. Og for dei mange frammøtte fall kveldens meny i smak.

— Dette var nydeleg. Her var det masse gode smakar. Og så er det ekstra spanande når ein ikkje veit kva ein et, seier Kirsti Kallestadbakken og rosar arrangørane for den flotte festen.

— Det er kjempebra at dei har stelt i stand dette. Og så kjekt at det kom så masse folk, seier ho.