Dette var ikkje mål, meinte dommaren
Laga hadde følt kvarandre på tennene gjennom heile kampen. Begge laga hadde hatt sine sjansar og halvsjansar, men hadde ikkje klart å finne nettmaskene. Så eksploderar kampen dei siste minutta, etter at Skudenes tar leiinga i det 85. minutt. Kapteinen og stopparen Thomas Risdal set inn ein retur etter frispark.
Dette utløyser eit stormløp mot Skudenes-målet dei siste minutta, noko som resulterer i at ein Skudenes-forsvarar sleivsparkar ballen mot eige mål. Ballen tek turen opp i stolpen, før den går inn i vinkel-bøylen og sprett omlag ein halvmeter inn i målet før den sprett ut på banen igjen. Heimelaget jublar for utlikning, men dommaren, Svein Hegland, ville det annleis og rista på hovudet.
Vats94/Skjoldar-spelarane var i harnisk etter kampen, men ingenting kunne få dommaren til å omgjera avgjerda.
