Fann tonen på sone 2
Gjennom valfaget Innsats for andre, får elevar ved Skjold skule eit litt annleis skulefag på timeplanen. Målet med faget er å bidra til verdiskaping, noko som gjer godt både for eleven og andre.
Middagslukta heng framleis i veggene på omsorgssenteret i Nedre Vats, og det er ei stille ro som pregar sone 2. For mange er det tid for middagslur, men i daglegstova har ein gjeng samla seg og drøsen summar og går. Unge tenåringsjenter sit i prat med nokre av kvinnene som bur her fast, og sjølv om dei er i kvar sin ende på livet, har dei overraskande mykje til felles likevel.
— Eg synest det er veldig kjekt å få vera med å gjer ein innsats for at andre skal ha det bra. Å vera med å gleda i kvardagen, seier 13 år gamle Sofie Eike frå Vats, som går i 8. klasse på Skjold skule.
Sambygding og 9. klasseelev Karoline Ohm (15) er heilt einig. Dette valfaget er eit av dei få faga i skulekvardagen som handlar om å gjera noko for andre. Det er veldig viktig, meiner begge jentene.
