Vellukka ungdomsprosjekt
Ungdomsskuleelvar ved skulane i Etne og Vindafjord har delteke på eit prosjekt om rus, psykisk helse og nettvett. Det har dei lært mykje av.
— Me har mellom anna lært at me må seia nei og stå for eigne meiningar, og at me må passa på kvarandre. Me har lært at me ikkje skal bry oss om drikkepress og kroppspress og at me skal tenkja på kva me legg ut på nettet, seier dei to åttandeklassingane ved Skjold skule, Ingebjørg Haraldseid og Nicolai Skjold.
Dei har delteke på eit prosjekt i regi av SLT-koordinatoren i Etne og Vindafjord og skulane i dei to kommunane, og er begge meiner at prosjektet har vore svært nyttig og lærerikt.
— Me har jobba to veker med prosjektet på skulen der me har svart på spørsmål om rus, psykisk helse og nettvett. Og i kveld avslutta me prosjektet med skodespel, seier dei.
