Heimetrening gjorde susen
Trening i heimen er eit av tilboda Vindafjord kommune kan tilby eldre og andre som har behov for hjelp til å meistra daglege oppgåver. For 86 år gamle Borghild Rullestad frå Vats har dette vore heilt avgjerande.
— Utan dette tilbodet hadde eg blitt sitjande, seier Borghild Rullestad og byr på kaffi heime i stova i Åmsosen.
Ho sender ein varm takk til teamet som har hjelpt ho på beina att og gjort det mogeleg at ho igjen kan svinga kaffikjelen og invitera til kaffikos utan hjelp frå andre.
Med heimehjelp eit par dagar i månaden og litt hjelp til innkjøp klarar 86-åringen seg godt. Livsgnisten er tilbake og kroppen spelar igjen på lag. Slik var det ikkje for ei tid tilbake då den tidlegare så spreke pensjonisten vart råka av sjukdom.
