Bluesen fortvilar
Det har vore få alvorlege hendingar knytt til Skånevik bluesfestival dei siste året. Difor vil ikkje Etne kommune lenger ha ein eigen lege på vakt i bygda under arrangementet.
Den 22. utgåva av Skånevik bluesfestival går av stabelen 5 — 7. juli i år. Fram til no har Etne hatt ein ekstra lege på vakt ved helsestasjonen fredag og laurdag kveld og natt. Det blir det slutt på frå i år.
I eit brev som helseleiar Hilde Høyland i Etne kommune har skrive til festivalen går det fram at ein representant for kommuneoverlegen i Etne, helseleiarar i Etne og Vindafjord og avdelingsleiar legevakt har konkludert med at ein ikkje lenger har behov for legevakt i Skånevik under festivalen som tidlegare år.
— Ein ser ein markert endring i konsultasjonar hos legevakt etter 2014. Det er få hendingar, og dei hendingar som har vore har vore av mindre alvorleg karakter, og kunne vore behandla på ordinær legevakt i Ølen/Haugesund, skriv Høyland.
