Stor interesse for stor skjerm
Tidlegare har dei lånt ut produkta sine til store kundar som har vore på SMM. Sist veke var dei sjølve på plass i Hamburg for å vise fram det siste nye av teknologiutvikling på den maritime skjerm-fronten.
SMM er verdas største messe innanfor skipsbygging og marin teknikk og difor ein viktig møteplass og arena for å marknadsføra sine produkt. Hatteland Display har mykje dei vil nå ut med.
— For oss handlar det også om at me no er fleire selskap som seglar under same paraply, og dermed har eit langt større produktspekter å vise fram. For oss i Hatteland Display står denne 55-tommaren i sentrum. Med 4K-oppløysing og ein heilt ny touch-funksjon, reklamerer Frode Grindheim og Torhild Skrunes.
Førstnemnde kjem frå Etne og er produktsjef, medan Skrunes frå Vats er seljar, i all hovudsak i Noreg. På plass er også Bente Stene frå Ølen. Ho er også seljar, og har den viktige og store nederlandske marknaden som sitt ansvarsområde.
