Eldsjela gler seg til ny festival

— Det var ikkje så lett å seia noko på laurdag. Det var ei kjenslemessig sterk oppleving. Eg er utruleg takknemleg og rørt over å ta imot denne prisen, som er heilt i tråd med Anton si ånd, fortel Anja Våg Skjold frå Vikedal.
Den 23. september 2017 omkom Anton Holten frå Vikedal i ei ulukke i Bergen. I februar 2018 blei det arrangert ein minnekonsert for å heidra han. Samstundes blei Anton Holtens Minneforening oppretta, og det blei også bestemt at inntektene frå kvelden skulle nyttast til å dela ut to prisar. Den eine prisen skal heidra ei eldsjel, og det var denne prisen som blei delt ut til Anja Våg Skjold under Rootsfestivalen.
— Eg hugsar Anton som ein engasjert og positiv ungdom. Dette er ein fin måte å heidra minnet hans på. Eg er både stolt og rørt. I Vikedal er det mange eldsjeler som kunne fått denne prisen, seier Skjold.

Engasjert dame

Ho er sjef for Sommarfestivalen i Vikedal det sjette året på rad. Tidlegare har ho vore ein av motorane» for å få på plass både idrettshall og barnehage i bygda. Ho har også engasjert seg i arbeidet for å få kunstgrasbane i bygda, ho har vore volleyballtrenar i 20 år, i tillegg til å engasjera seg i styret, og ho har vore aktiv i 4H-arbeidet.
— Korleis får du tid til alt?
— Eg har ikkje gjort alt på same tid. Eg trur det er viktig å plukka ut noko du brenn for, i staden for å seia ja til alt. Då har du kapasitet til å følgja opp det du takka ja til. Idrettshallen er nok det som har teke mest tid, men slikt arbeid blir enkelt når du har så gode folk meg deg. I Vikedal er det mange av dei, meiner Skjold.
43-åringen vedgår likevel at det var godt ho ikkje visste kor mykje arbeid som kravdest, før ho gjekk i gang med engasjementet rundt idrettshallen.
— Prosjektet var eit samarbeid mellom folk frå Vikedal, Sandeid og Imsland. Difor ønskjer eg at prispengane går til nytt utstyr idrettshallen, der ungdomsskuleelevar frå alle desse tre bygdene har gymnastikk i skuletida, seier Skjold.