Etter invitasjon frå Fikse Næringsforeining var fiskeriminister Harald Tom Nesvik i Etne og Vindafjord tysdag ettermiddag. Første stopp var fiskefella i Etneelva der ministeren fekk eit innblikk i forskingsarbeidet som blir utført ved Havforskingsinstituttet sitt anlegg, før turen gjekk vidare til Vikebygd og Bremnes Seashore sitt settefiskanlegg i Trovåg. Undervegs møtte også han lokale partifeller som kom for å helsa på ministeren frå FrP.

— Dette har vore ein svært interessant dag som viser spenn, utfordringar og muligheiter, seier Nesvik etter at rundturen er over.

Fiskeriministeren let seg imponere over arbeidet som blir gjort både ved laksefella og anlegget i Trovåg.  Han er tydeleg på at me treng ei frisk og sunn villaksstamme her til lands, og understreka kor viktig det er at oppdrettsnæringa er sitt ansvar bevisst for å gjera dette mogeleg.

— Me har internasjonale forpliktingar til å ta vare på villaksen og me må vera med på å finansiera prosjekt som tek vare på villaksstamma, sa ministeren under besøket i Etne og meinte oppdrettsnæringa sjølv må ta ansvar for å rydda opp etter seg når oppdrettslaks kjem på villspor.

— Næringa må sjølv ta ansvar for å ta seg av rømt fisk. Etter kvart som me får identifisert kor rømminga kjem frå, skal rekninga gå til oppdrettar og forureinar. Å finna oppdrettar kan gjerast gjennom DNA- og skjellprøvar, sa han og er glad for at næringa sjølv også er villig til å ta vare på villaksen.

Villaks og oppdrett kan leva side om side

Harald Tom Nesvik, fiskeriminister

Mindre rømming

Flytefiskfella i Etneelva er unik i sitt slag og undersøkjer mellom anna mengd, helse og opphav for villaks, sjøaure og rømt oppdrettsfisk, og ved fella er det så langt i år registrert 945 villaks, 930 aure og 17 oppdrettslaks i år. Det er positive tal med tanke på oppdrettslaks og rømming.

— Det ser ut til å bli eit middels år med tanke på villaks, og det ser ut til å gå ned med oppdrettslaks i fella. Både villfisk og oppdrettsfisk ser stort sett frisk ut, seier forskar og prosjektleiar ved Havforskingsinstituttet Øystein Skaala som tok ministeren med på ein rundtur på anlegget.

Skaala minna om at det er viktig å halda elvane fri for rømmingar og ytra ynskje om fleire liknande anlegg rundt om i landet som kan vera med på å overvaka laksen enten den er vill eller fora opp i anlegg.

— Me treng fleire anlegg som dette. Ein del av oppdrettslaksen kan mellom anna bera med seg sjukdomsframkallande virus, seier han.

Rom for begge deler

Bremnes Seashore med base på Bømlo er eit av landets største oppdrettsanlegg og har avdelingar mellom anna på Trovåg i Vikebygd. Settefiskanlegg i Trovåg får inn rundt 1 million befrukta egg i veka, som først etter å ha vakse seg til ein halv kilo i vekt blir sett ut i merdar i sjø. Gjennom å auka tida i tankane på land kan oppdrettar redusera tida i sjø til om lag eitt år før laksen er klar for middagsbordet.

Kortare tid i sjø betyr redusert fare for luseangrep og forureining. I Trovåg forskar dei stadig på nye metodar som skal bidra til eit betre miljø både for fisken og naturen. Det tre år gamle anlegget til med ein prislapp på rundt 600 millionar kroner, er konstruert på ein miljøvenleg måte der mellom anna alt vatn i tankane blir reinsa og resirkulert. Når fisken er klar for sjø, blir det brukt merdar og nøter som skal redusera rømmingsfaren, og reinsefisk og brakklegging av fjordområde blir nytta for å halda luseplagene nede. Både sjøkvalitet og botnforhold rundt merdane blir nøye overvaka.

— Seashore eit skuleeksempel

— Det er veldig streng kontroll, og for å lukkast økonomisk må me lukkast med berekraftmotivet, seier administrerande direktør Einar Eide som styrer eit konsern som i fjor omsette for over 2,5 milliardar og som har heile Europa og deler av Asia på kundelista.

For fiskeriminister Nesvik fell konsernet sine visjonane om ein bærekraftig og miljøvenleg strategi i god jord, og han rosar bedrifta både for kvalitet, produktutvikling og for å gjera seg nytte av heile fisken utan å la noko gå til spille.

— Bremnes Seashore er eit skuleeksempel på korleis ting kan gjerast. Dei tek vare på heile fisken samstundes som dei tek vare på kvalitet. Det er miljøvenleg og bærekraftig, seier Nesvik og meiner både oppdrett og villaks kan leva godt saman under visse føresetnader.

— Villaks og oppdrett kan leva side om side, men då må me løysa lus- og forureiningsproblem. Det er veldig lite forureining frå merdane i dag og det blir gjort mykje mot lus. Ein kan bruka teknologi som er miljøvenleg og kortare tid i sjø gir lågare muligheit for lus, seier han.

Før besøket i Etne og Vindafjord var fiskeriministeren innom Karmøy der han deltok på møte om kvotemeldinga, og etterpå gjekk turen vidare til Bergen.