Flytting gav fart på salet

Eigar Øystein Øverland (62) tregar ikkje på avgjerda om å satsa på større butikk i nye lokale like over gata, på rett» side av europavegen. Dei påfølgjande åra har Etne Elektrosenter AS auka omsetninga med 60 prosent.

— Det har gått over all forventing. Me hadde greidd oss med ti prosent auke for å forsvara investeringa, men håpte på 20 til 25 prosent, så denne veksten såg me ikkje koma. Flyttinga har opna ei ny verd for oss, seier Øverland tilfreds.

Styrka eigenkapital

Etter eit halvt års drift i nye lokale som Expert-butikk, har Power-logoen prega fasaden på det gamle Coop-butikken midt i Etne sentrum. Tidlegare låg elektrobutikken på ein årsomsetning på mellom åtte og ti millionar kroner. I fjor enda driftsinntektene på 17,7 millionar, som gav eit fint resultat på botnlinja på 1,6 millionar før skatt.

— Den gode trenden har halde fram og me ligg an til ein grei vekst også i 2019, seier dagleg leiar Øystein Øverland i Etne Elektrosenter AS.

Dei fine resultata har gjort at eigaren har kunna putta eit par millionar av overskotet på eigenkapital-kontoen, som dermed har gitt ein styrka soliditet frå 4,8 til 36,7 prosent i løpet av to år.

Meir effektiv drift

Elektrosenteret er ein av dei mest tradisjonsrike butikkane i Etne sentrum. Den gjekk i mange år under namnet Kaldheim & Co. Øverland blei eigar på 1980-talet av den tronge butikken med berre 120 kvadratmeter lokale. Då Coop etablerte seg i nytt kjøpesenter, slo Øverland til og sikra seg eigedommen på motsett side av vegen for 4,8 millionar. Han selde den gamle eigedommen og fekk med ein god slump kapital til investeringa i ny butikk.

Dermed hamna han på rett side av vegen for kundar som kjem frå vest, samstundes som butikken fekk firedobla salsflata, betre varemottak, rikeleg med lagerplass, samt meir og betre parkering.

— Alt dette har verka positivt inn på handelen. Det er mykje enklare å driva for oss nå og kundane finn lettare fram det dei jaktar på, seier 62-åringen.

I dag er det rundt seks årsverk i driftsselskapet, fordelt på fire på heiltid og resten i deltid. Den langt meir effektive måten å driva på, har gjort at den store veksten har kome utan at staben er auka med meir enn vel ei halv stilling.

Den auka kundemassen er godt fordelt på handlande frå Vindafjord, etnebuar og hyttefolk. Trass veksten karakteriserer Øverland konkurransen som tøff, men trur det nye systemet med internettstyrte prisar, som butikken innførte ved opninga for snart to år sidan, er til god hjelp.

Uventa plage

Det store butikkbygget på 1.200 kvadratameter grunnflate og eit totalareal på 1.800 kvadratmeter, er langt meir enn kva Power-butikken treng. Difor er det også blitt plass til blomsterbutikk i gateplan, og systove og fotoverksemd i andre etasje.

Planar om å innreia tre eller fire leilegheiter i andre høgda, er førebels lagt på is. På agendaen nå står ein del renovering, blant anna av taket, og ta tak i eit uventa problem som dukka opp på baksida, der butikken har stasjon for retur av elektrovarer.

— Dessverre er det ikkje berre returvarer som hamnar der. Her finn me stadig matavfall, møblar, bildelar og mykje anna som høyrer heime ein heilt annan stad, seier ein frustrert Øverland.

Problemet skal løysast med å få returstasjonen under tak, noko som også gjer det lettare å handtera avfallet. I tillegg ser eigaren behovet for å setja opp eit videokamera for å gjera slutt på misbruket.

Trass denne frustrasjonen er det god grunn for Etne Elektrosenter til å jubla over suksessen som også er med og fører Etne kommune oppover på lista over handel per innbyggar. Berre Haugesund, Stord og Odda i regionen ligg høgare på SSB sin statistikk for fjoråret.