Éin kommunal el-bil på deling
På parkeringsplassen ved rådhuset i Ølen står ein einsleg el-bil med straumkabelen festa til ein av dei fire ladestasjonane på staden. Bilen er øyremerka tilsette på rådhuset og er den einaste el-bilen i Vindafjord kommune sin bilpark. Trine Sørensen frå Ølen er ein av brukarane som flittig nyttar seg av det miljøvenlege transportmiddelet, og når ho skal ut på oppdrag bookar ho alltid den vesle svarte Nissan-bilen.
— Servicetorget tek seg av bestillinga, og bilen er vanlegvis tilgjengeleg. Eg vel denne bilen heilt bevisst og er kjempenøgd med å køyra el-bil. Den står alltid opplada og klar, seier Sørensen som bevisst nyttar el-bilen når ho skal ut på oppdrag.
— Eg har ikkje hatt behov for å lada undervegs så eg har ingen rekkeviddeangst. Bilen er behageleg og lettkjørt, seier ho.
