Fleire bønder droppar mjølk
Stadig fleire mjølkebønder gir seg i Rogaland, viser ein oversikt over kvotesal. I alt 94 bønder gav opp i fylket og selde kvota i år. Og det kan bli endå fleire når staten skal kjøpe ut kvotar neste år.
På kort tid skal produksjonen av norsk mjølk ned med 100 millionar liter, og frå januar 2020 startar staten eit oppkjøp av 40 millionar liter på frivillig basis i mjølkeregionane.
Med ei jamn fordeling betyr det at det kan bli kjøpt ut over 7 millionar liter i Rogaland og nesten 5 millionar i Vestland, Hordaland pluss Sogn og Fjordane.
Dei resterande kutta vil lande på alle mjølkebønder sitt bord ved at dei ikkje får produsere så mykje som før. Kor stort denne nedjusteringa av produksjonen blir, blir avgjort ein gong før jul.
