Vil laga kunstig snø
Vindafjord IL vil ha barn og unge ut på ski og akebrett i nærområdet. Planen er å kunna produsera eigen snø i løpet av få år.
Vinteridretten har stått relativt sterkt i Vindafjord trass milde vintrar og lite snø. Nå er idrettslaget i gang med å utvikla Fjellstøl ski- og friluftsanlegg til også å få anlegg for produksjon av kunstig snø.
Året etter at nybygget på Fjellstøl i Sandeid blei opna er idrettslaget godt i gang med å planlegga eit anlegg med tre kanoner som kan produsera snø om vinteren. Primus motor og nestleiar i Vindafjord IL, Lars Olav Larsen slår fast at dette langt frå er eit luftslott, men at det er visse utfordringar for å koma i mål.
— Då nybygget blei reist, tok me høgde for snøproduksjon ved at det blei montert utstyr i den store beredskapstanken for vatn som blei lagt ned, med tanke på dette føremålet, seier Larsen.
