Treng fleire jenter
Ho har bestått dei fysiske testane og har alt vore ute på utrykking. Elisabeth Mattingsdal (29) er første kvinne som har valt brannkonstabel som deltidsyrke i Vindafjord.
I november i fjor auka talet på kvinnelege brannkonstabler i Etne og Vindafjord brannvesen til det doble, og i dag har begge kommunane kvar si kvinne i brannkorpset. Elisabeth Mattingsdal frå Sandeid blei den første kvinna i Vindafjord som fekk seg jobb i det herredominerte yrket, nesten to år etter sin kvinnelege kollega Lise Åsheim ved brannstasjonen i Skånevik. Til dagleg har den ferske brannkonstabelen arbeid som fengselsbetjent ved Sandeid fengsel, og det var her ho blei introdusert til yrket.
— Det starta med ein kollega som er med i brannvesenet i Skjold og som trudde eg kunne passa i brannvesenet, fortel den ferske brannkonstabelen.
29-åringen måtte tenkja seg litt om før ho tok steget og bestemte seg for å søkja.
