Ser eit håp i at det blir noregsferie
For første gong på 15 år såg Inger Karin Larsen (65) ved Skånevik Fjordhotell at inntektene ville overstiga utgiftene i løpet av mai. — Eg kjende meg høgt oppe, men så kom det bratte fallet, seier ho.
Det låg an til å bli den beste mars og april i Inger Karin Larsen si historie som hotelleigar, og ho tenkte: Endeleg!
— I alle dei 15 åra eg har eigd og drive hotellet har seinvinteren og våren vore dryge månadar, og kvart år er det bluesfestivalen som har sørgd for at eg har kome à jour økonomisk. Men for første gong såg eg at bookingane me hadde inne i mars og april, ville sørgja for at eg kom à jour allereie i mai, seier Larsen.
I tillegg rekna ho med at det ville koma inn fleire bestillingar på enkeltovernattingar og i helger, og inntektene frå heile sommaren, med både Pippifestival og Skånevik Bluesfestival ville for første gong gitt hotelleigaren ein økonomisk buffer som ho kunne ta med seg inn i 2021. 65-åringen som aldri har tatt ut ei krone i løn, kjende seg letta.
