Aslaug Mala ved old River Saloon i Etne er klar for sommarsesongen.
Arkivfoto:Irene Mæland Haraldsen
Etterlyser lik smittevernpraksis
Kommunar rundt om i landet praktiserer ulike tiltak for å hindra smittespreiing etter at utestader og arrangement igjen er opna. Aslaug Mala ved utestaden Old River Saloon i Etne etterlyser ein felles strategi for kommunane i distriktet.
For ein dryg månad sidan gav myndigheitene her til lands løyve til opning av serveringsstader og utestader for opptil 200 personar dersom drifta er smittevernfagleg forsvarleg. Det betyr at verksemdene skal syta for at besøkjande og personell kan halda minst éin meters avstand, ha gode rutinar for hygiene, syta for at krav til reinhald blir følgt og ha sitjeplassar til alle gjestene. Ved serveringsstader som tilbyr buffet er det eigne og strenge reglar som gjeld, og der det blir servert alkohol skal servering skje ved bordet.
For å sikra at reglane frå Helsedirektoratet og Folkehelseinstituttet blir tatt til følgje, har smitteavdelinga i Vindafjord kommune sett i verk sporadisk kontroll av utestader og serveringsstader, medan Etne kommune har lagt vekt på førebyggjande tiltak gjennom informasjon og direkte kontakt med den enkelte arrangør for å minna om reglane som gjeld til ei kvar tid. For eigaren av Old River Saloon er Etne kommune sitt opplegg ikkje tilfredsstillande, og nå etterlyser Aslaug Mala eit breiare samarbeid mellom kommunane i distriktet for å sikra like reglar og oppfølging.
— Me har ikkje hatt direkte kontakt med kommunen, og me har berre fått ein kopi av dei sentrale reglane. Det har eg lese før eg får det. Eg saknar eit møte mellom kommunane, arrangørane, politi og skjenkekontroll for å få eit felles opplegg. Ingen i distriktet praktiserer likt, seier Mala og fortvilar over ulik praksis på ulike serveringsstader og arrangement i distriktet både når det gjeld reglar og stengetid.
