Ved stallen på aktivitetsgarden i Ølensvåg står ein gjeng forventningsfulle ungar og speidar etter ridegruppa som er på veg tilbake til møteplassen etter dagens første ridetur. Spent ventar dei på å få seg ein tur på hesteryggen før dei skal litt lenger ned i lia for å prøva seg på hesteskokasting, bogeskyting eller få seg ein køyretur i hestekjerra.
Koronareglane blir godt ivaretatt og alle små hender har fått seg ein omgang med handsprit før ny ryttar kjem på plass i sadelen. Ikkje alle har prøvd seg som ryttar før, men for sju år gamle Olena Larsen frå Sandeid går rideturen som ein leik.
— Eg elskar å ri. Me har tre hestar heime og eg har min eigen hest. Eg har ridd i to år, seier den hesteinteresserte sjuåringen som deltek på Camp Vindafjord før første gong.
