Her er den nye lensmannen

Blant dei ti søkjarane til den ledige stillinga etter Ingvar Gjærde, kom Sør-Vest politidistrikt fram til ein osing med ein brei politi-cv og eit stort engasjement for beredskap og samfunnsutvikling. Men så mykje om dei to kommunane han snart får ansvar for, veit den påtroppande lensmannen førebels ikkje.

— Men det vil endra seg. Eg ser fram til eit godt samarbeid med innbyggjarane, kommunane og næringslivet. Planen er å busetja seg i Ølen-området ein stad. I dag kjenner eg innbyggjartalet, at det er ein del store bedrifter i dette området og at det er mykje fjell og fin natur der, seier Tore Walden til Grannar.

Dette med turmuligheiter og å bruka natur på fritida var ein av grunnane til at han søkte nettopp den leiande politijobben i Etne og Vindafjord. Nærleiken til naturen var også ballast frå oppvaksen på Nordstrøno, ein liten stad i tidlegare Os kommune.