Dronning Sonja og kong Harald slik vi har sett dei mang ein gong på slottsbalkongen 17. mai. Her frå 2019.
Foto: Berit Roald / NTB / NPK
30 år sidan Harald og Sonja vart Noregs kongepar
Søndag er det 30 år sidan kong Olav døydde og kong Harald tok over posisjonen som Noregs statsoverhovud.
– Eg var lettare livredd, har kongen sagt om tronskiftet.
Sjokkbeskjeden om at kongen var død kom seint på kvelden 17. januar 1991. Morgonen etter talte kong Harald til det norske folket i NRKs radiosending.
– Kjære landsmenn. Hans Majestet kong Olav er gått bort. Eit stort tap og ei djup sorg har ramma oss alle. I denne tunge stunda gir det meg og familien min styrke å vite at heile det norske folket saman med oss delar sorga ved døden til den kjære faren min, sa kongen.
Same natta hadde han i tråd med Grunnlova kalla inn regjeringa til statsråd på Slottet og gitt eiden sin om å regjere landet i tråd med lovene og konstitusjonen.
