60-åring framstår i ny drakt
Etter ein omfattande oppussingsrunde kan dagleg leiar Anne Lise Sjurseike ønskja kundane velkomne til eit lyst og romsleg butikklokale med eigen kaffikrok og ferske godsaker frå bakardisken ved Knapphus bensinstasjon.
Like over nyttår starta oppussingsarbeidet ved bensinstasjonen på Knapphus, og etter knappe to månader med ulike handverkarar i sving har det tidlegare butikklokalet fått ein skikkeleg ansiktsløft. All innreiing er byta ut, butikkdisken er forlenga, kaffistasjonen har fått ny plassering, kjøleanlegget er nytt, sanitetsanlegget er utvida og har gitt rom for fire toalett, dusj og stellerom. Ein ny og romsleg kaféavdeling har fått plass i enden av lokalet der vegfarande kan nyta ein kaffiskvett eller kosa seg med ein nysteikt bolle rett frå steikeomnen.
— Alt er nytt. Nå manglar berre litt bilde på veggene og så må me gjera noko med inngangspartiet, seier Anne Lise Sjurseike og ser enden på oppussings-prosjektet.
Arealet er det omlag like stort som det var før renoveringsarbeidet tok til, men ved første augekast verkar det romslegare og lysare.
