Tor Åge Hundseid i Vikedal Gardsmat gjekk heilt til topps i Det Norske Måltid i 2020 med si vellagra spekeskinke. Det blir mogleg å få ein bit av vinnarskinka under årets Etnemarknad.
Foto:: Kristin Austigard/Det Norske Måltid.
Lagar Noregs beste spekeskinke
Fredag kveld blei spekeskinka frå Vikedal Gardsmat kåra til årets foredla kjøt i finalen i Det Norske Måltid 2020.
I omtalen frå den faglege juryen får spekeskinka frå Tor Åge Hundseid og Vikedal Gardsmat svært heiderleg omtale der tradisjonelt handverk og respekt for råvaren blei trekt fram som faktorar som bidrog til den prestisjetunge prisen. — Nydeleg aroma og modna kjøt som smeltar på tunga. Dommarane gler seg over at vi har dedikerte fagfolk som tør å satse og gi kjøtet tid til å utvikla den unike smaken. Dette er verkeleg eit produkt å vera stolt av, heiter det i juryen si grunngjeving.
Glad vinnar
For Tor Åge Hundseid kom vinnarmeldinga som ei overrasking og han er glad og stolt over å ha kome til topps.
