Mykje å finne på ute for dei som er heime i påska

Sju av ti nordmenn har planar om å vere heime i påskeferien, viser ei fersk undersøking. Men det er mykje å finne på ute sjølv om ein er heime. Det er ei undersøking frå Ipsos, på oppdrag frå Gjensidige, som fortel at eit fleirtal av oss har planar om heimepåske. Paraplyorganisasjonen Norsk Friluftsliv meiner det er mykje å finne på utandørs, anten ein er van med heimepåske eller er koronafast.

— Kva med å leggje bort mobiltelefonar og andre merksemdstjuvar og berre gjere noko hyggjeleg saman ute?, spør generalsekretær Bente Lier.

Ho minner om at allemannsretten gjer det mogleg med store opplevingar også for dei som ferierer heime. Og at det er ein ekstra bonus at heimeferien både er snill mot lommeboka og miljøet.

Her er ni tips frå Bente Lier og Norsk Friluftsråd om aktivitetar i påska:

1: Besøk ein gapahuk : Finn ut kvar den nærmaste gapahuken er, og legg turen dit. Gapahukar er ofte plasserte på stader som er enkle å finne, og ofte er det også bålplass der.

2: Tenn bål og lag appelsin-brownie : Eit bål gir god stemning, men det er også mogleg å lage mat. Med brownierøre på termos, som igjen blir fylt ned i uthola appelsinar , er det kjapt å lage ein god påskedessert på bål.

3: Ligg i hengjekøya og les påskekrim : Heng opp hengekøye i nærnaturen, ta med ein spennande påskekrim og lat roa senke seg. Hugs varme klede og noko godt å bite i.

4: Spel påskekubb: Kubb er like moro i påska som elles i året. Kva med å utfordre nærkontaktane til ei påsketurnering?

5: Lag eggerettar ute: For mange høyrer egg med til frukost eller lunsj i påska. Kva med å flytte matlaginga ut? Eggerøre, omelett eller tur-Quiche er enkelt å lage på primus eller bål.

6: Påskeleikar: Påskeskirenn er moro både for born og vaksne. Om snøen er borte, så kan ein heller arrangere eggeløp, sekkeløp eller ei artig hinderløype ute.

7: Ta ei natt ute: Det er noko spesielt med å sove ute i naturen. Visste du at i påska i fjor overnatta nesten 400.000 nordmenn ute?

8: Finn påskepynt i naturen: Gåsungar, kongler og anna frå naturen kan bli fin bordpynt. Kva med å lage påskepynt med element frå naturen saman med borna?

9: Tid for årets første bad: Isbading har vore i vinden som aldri før denne vinteren. Isen har smelta mange stader i landet, men det er framleis kaldt nok til at du kan skryte til vener og kjende om du hoppar i sjøen i påska. (NPK)<