Slik vil hurtigladarane sjå ut når dei er installert. Illustrasjon: BKK
BKK byggjer ladenett for elbåtar
BKK byggjer det første nettverket av hurtigladarar til elbåtar i Nord-Europa. Dei første ladarane står klare om få veker, og BKK ser etter fleire stadar å byggje.
– Noreg har stått i spissen for elbilrevolusjonen. No vil vi gjere det lettare å byta til elbåt, seier konsernsjef i BKK, Jannicke Hilland i ei pressemelding.
Dei første elbåtladarane kjem i Bergen, Florø og Oslo. BKK har jobba med planane over tid. Særleg dei siste månadene har elbåtinteressa vorte merkbart større.
— Det vil ta tid før elbåtmarknaden blir stor, men skal det bli ein marknad, må lading vera trygt og tilgjengeleg. Både båteigarar, marinaer, båtforhandlarar og politikarar har stilt spørsmål om korleis lading skal skje. Denne uvissa reduserer vi no, seier Hilland.
Elbåtladarane blir ein del av BKK-selskapet Plug som frå før byggjer og driftar landstraumanlegg til skip. Saman med Bergen Havn har selskapet bygd det største landstraumanlegget for cruiseskip i Europa.
