Straumprisane har vore høge på byrjinga av året.
Arkivfoto: Alf Ove Hansen / NTB / NPK
Dobbelt så høg straumpris i første kvartal
Den totale straumprisen for hushalda, medrekna avgifter og nettleige, var i gjennomsnitt 120 øre per kilowattime i første kvartal i år, skriv SSB.
Det er 37 prosent høgare enn i første kvartal i 2020, då straumprisane var lågare enn dei har pleidd å vere dei siste åra. Trekkar ein frå avgifter og nettleige, var kraftprisen nesten dobbelt så høg i første kvartal i år. Dei siste ti åra har straumprisen berre vore høgare i slutten av 2018 og i byrjinga av 2019.
I februar løyvde Stortinget 260 millionar kroner ekstra til bustøtte for å hjelpe mottakarane med å betale dei høge straumrekningane under kuldebølgja. I januar og februar låg gjennomsnittstemperaturen i Noreg høvesvis 3,3 og 2 grader under normalen.
