Frå Hywind Tampen-prosjektet i 2021.
AKRIVFOTO: TORSTEIN TYSVÆR NYMOEN
Stor dag på Dommersnes
Klokka 06.52 torsdag nådde den første av dei 11 Hywind Tampen-fundamenta som blir støypt på Dommersnes sin fulle høgde på 107 meter.
Sidan mai i år har støypen på Dommersnes ved Vikebygd gått døgnkontinuerleg. Det er støypinga av 11 understell til det som skal bli verdas største flytande vindpark, Hywind Tampen, som går føre seg på det kommunale industriområdet rett sør for Vikebygd.
Torsdag nådde det første understellet full høgde på 107 meter. Seinare på dagen inviterte Equinor og Aker Solutions på kake til både eigne og leverandørane sine leiarar saman med pressa til det dei kalla ei milepåle-markering for prosjektet.
— Det er høg aktivitet i Hywind Tampen-prosjektet både i Noreg og i utlandet. Men det er hyggeleg å kunne seie at det er her på Dommersnes det skjer mest, sa Ørjan Rist då han ønskja velkomen til markeringa. Han er Equinor sin prosjektleiar for bygginga av dei 11 understella som no veks seg store i Ålfjorden, godt fundamentert til ei stor lekter som breier seg ut frå det kommunale industriområdet på Dommersnes.
