God vekst, men inga typisk gaselle
For HIM Transport AS er gode teneste og få avvik viktigare enn vekst og kommersiell suksess. Likevel er bedrifta some er registrert i Skjold, blant dei elleve lokale gasellebedriftene.
Dagens Næringsliv har sidan 2003 saumfart landets aksjeselskap på jakt etter suksessfaktorar innafor vekst og gode resultat. Kriteria for å bli karakterisert som gasellebedrift er godkjent rekneskap, minst dobla omsetning over fire år, over éin million i driftsinntekter første år, positivt samla driftsresultat og ingen fallande omsetning i perioden.
Styreleiar Gro Staveland i HIM Transport synest det er flott å få tilbakemelding på at drift og resultat er positiv, men slår fast at økonomi og vekst ikkje er den viktigaste biten for selskapet som utfører renovasjonsoppdraget på vegner av morselskapet Haugaland interkommunale Miljøverk iks.
— Me er mest opptatt av at tenestene blir gjort på ein god måte og med få avvik. Tilbakemeldingane frå abonnentane er ganske tilfredsstillande og tyder på at denne jobben blir gjort på ein god måte, seier Staveland.
