Storstilt 40-årsfest
Laurdag markerte Skjold med opent hus at det er 40 år sidan dei innvia bygdahuset. Dagleg leiar Siri Nonslid rosar skjoldabuen for innsatsen for bygda sitt møtepunkt gjennom åra.
— Dugnadsvilja har alltid vore stor i Skjold, seier Nonslid.
Bygdahuset er grunnsteinen til det som i dag er Skjold Arena.
Annonse
Lovprisa gammal helt
Skjold Arena er så omfangsrikt at det på jubileumsdagen vart arrangert eigne visningsrundar i det anvendelege huset. Det er ikkje mykje som minner ein om at den sentrale delen av bygningsmassen er 40 år. Her er ljost, moderne og funksjonelt.
Ikkje minst er det godt vedlikehalde, og areala ligg opent og naturleg til kvarandre. Det fulle namnet er Skjold Arena – Kultur og Idrett SA, Gudmund Thomassen er styreleiar i jubileumsåret, mens Nonslid har den daglege leiinga, slik det har vore i mange år.
— Det er berre litt spesialarbeid me treng ekstern hjelp til. Me har stort sett folk i eigne rekker i dei profesjonane me treng, fortel Nonslid (55).
Annonse
Av dei mange som for 40 år sidan la ned ein enorm innsats, vart no avlidne Berthel Kvamme spesielt trekt fram. Som teikn på den enorme innsatsen hans, fekk han på opningsfesten i 1982 ein stressless-stol som teikn på at no måtte han kvila ut. Denne haldninga har mange folk i bygda teke over. Det multifunksjonelle anlegget fekk dagens namn i 2010, etter at idrettshallen var reist.
Samarbeider godt med skulen
Av sentrale folk i drifta av huset gjennom åra, var blant andre noverande styremedlemer Per Ivar Ertresvåg (72) og Johannes Hustveit (56) til stades. Dei var einige om at det er Nonslid og Jarle Haugen som har det meste av æra for at huset i dag er så viktig for identiteten til bygda.
— Skjold skule er ein god samarbeidspartnar og leigetakar. Den stabile inntekta frå kommunen har vore god å ha gjennom pandemien. Økonomien er jamt bra, men me merkar meirkostnadane no med den høge straumprisen, seier den daglege leiaren.
Frå scena, leia av konferansier Åsmund Ohm Børretzen, la banksjef Lars Olav Larsen i Haugesund Sparebank i Vindafjord vekt på dei svært ryddige og ordna forholda som alltid har vore rundt drifta og økonomien.
Trur ikkje det har vore gutar her
I sminkerommet til UL Skjoldafjord er det liv. Det er Elisabeth Nielsen (28) som sminkar ungane med festlege fargar og motiv.
— Kanskje er det berre jenter som har vorte sminka i dag, trudde ni-åringane Sonja Eiknes (9) og Amalie Sørhus (9).
Ei anna jente i rommet ville ikkje ha namn og bilete i avisa. Ho var usikker på om ho hadde spurt far sin om lov til å vera der. I hovudrommet til ungdomslaget sat ei gruppe unge vaksne som tydeleg, og med god grunn, var stolte av lokala dei hadde pussa opp under pandemien. Laget er synonymt med revy, musikalar og barneteater.
— Me er aktive, og det har laget vore i 100 år i år. Lokala tykkjer me så mykje om at det er ein slags samlingsstad, er avtroppande leiar Trude Gullhaug (45) og noverande nestleiar Therese Nesheim (39) einige om.
Me har stort sett folk i eigne rekker i dei profesjonane me trengSiri Nonslid, dagleg leiar Skjold Arena
Annonse
Skjoldabuar i The Voice og Norske Talenter
På spørsmål om det kan vere ei kopling mellom huset og det faktum at over relativt få år har Berge Ohm, Gro Marit Messmer Larsen og Andrè Hustoft Nesheim hevda seg på høgt nivå i Norske Talenter og The Voice, er Nonslid og ungdomslagsmedlemene rundt bordet kledeleg tilbakehaldne.
— Alle dei tre har jo vore mykje her, både når det gjeld idrett og scenekunst, samstemmer dei.
Ungdomsklubben Hippo, Skjold Dartklubb, Skjoldar IL med fleire har òg klubblokala sine i huset.
Manglande gymnastikksal var ein av grunnane
Skjold skule fekk ikkje gymnastikksal då bygninga vart reist på midten av 70-talet. Det vart upraktisk å ha den gamle salen i den nedlagde skulen på Liaheia, så eit kompromiss var det då kommunen og bygdefolket etter noko strid bygde eit hus som kunne fungera både som samfunnshus og gymnastikksal.
Annonse
Førti år etter har bygda eit svært tidsrett kultur- og idrettsbygg. Når det på same området på Vikaneset ligg idrettsbanar og skule tett på, så er dei mange fornøgde andleta denne laurdag ettermiddagen ikkje utan grunn.
