På biblioteka i Etne og Vindafjord er alt klappa og klart for den digitale lesekampanjen Sommarles. Eit breitt utval av bøker for dei yngste lesarane er på plass i hyllene, og på premiebordet ligg små premiar klare for ivrige lesehestar som har meldt seg på den landsomfattande lesekampanjen for elevar i 1. til 7. klasse i regi av biblioteka.
Lesekampanjen varer frå 1. juni til og med 31. august, og i løpet av dei tre sommarmånadane kan deltakarane registrera bøker digitalt etter kvart som dei les, løyser oppgåver, samlar poeng, får premiar og følgjer med på kva venene les.
— Me har premiar for ulike nivå som barna kan henta på bibliotek i heile Noreg, fortel Ingeborg Sørheim og Silje Holden Birkeland ved høvesvis Etne bibliotek og Vindafjord bibliotek, og gjer seg klar til årets store lesefest.
