Norsk næringsliv og fleire organisasjonar fryktar at EUs nye eggregel vil svekkje den geografisk spreidde eggproduksjonen i Noreg og dessutan auke matsvinnet.
Illustrasjonsfoto: Terje Pedersen / NTB / NPK
Norsk næringsliv vil ikkje ha EUs nye eggreglar
Norske organisasjonar og næringsliv åtvarar mot meir matsvinn og svekt eggproduksjon dersom EUs forslag om å innskrenke haldbarheita på egg blir vedteke.
EUs forslag om å innføre 28 dagars haldbarheit for egg er for tida på høyring. Av 31 høyringssvar kjem 21 frå norske bønder, organisasjonar og næringsliv, melder Nationen.
Bakteppet for EU-forslaget er at delar av Europa slit med salmonellasmitte. I dag er haldbarheita på egg i Noreg 35 dagar. Det nye regelverket for EU vil i utgangspunktet gå inn under EØS-avtalen og dermed også gjelde Noreg.
– Fordelane ved ei meir fleksibel regulering er mindre matsvinn, mindre transport, lågare utslepp og moglegheita til å behalde ein desentralisert eggproduksjon med små einingar over heile landet, noko som reduserer risikoen for fugleinfluensa, skriv Anja Fyksen Lillehaug frå Bondelaget i høyringssvaret sitt.
