Bygdefolk og tilreisande tok turen til kyrkja i Vikebygd for å delta på bygdevandring med kyrkjebrannar som tema.
Foto: Irene Mæland Haraldsen
Lærerik vandring på vigsla grunn
To gonger på få år mista vikebuen kyrkja si i brann. Den dramatiske kyrkjehistoria var tema då festivalen Musikk i Vik inviterte til bygdevandring i sentrum der rundt 20 interesserte tilhøyrarar møtte opp.
Bygdevandring har stått på programmet under festivalen Musikk i Vik i Vikebygd sidan den første festivalen såg dagens lys for fire år sidan, og også i år inviterte arrangøren til vandring i sentrum. Tema for dagen var kyrkjebrannar i Vikebygd og i løpet av rundturen fekk dei frammøtte bli med på ei interessant tidsreise frå den første stavkyrkja stod ferdig på 1200-talet og fram til dagens kyrkje som blei sett opp i 1937. Guide og turleiar Ingrid Mathilde Sørvåg delte villig sin kunnskap om kyrkjene som opp gjennom åra har vore ein viktig samlingsstad for bygdefolket.
— Her stod den første kyrkja. Den var ei stavkyrkje og høyrde under Halsnøy kloster. Kyrkja blei riven i 1682. Den var den første av fem kyrkjer her i bygda. Også kyrkja som kom i 1682 stod på denne tomta. Då høyrde kyrkja til Fjeldberg prestegjeld. I 1870 blei kyrkja demontert og selt på auksjon. Ei av dørene frå kyrkja er nå på Plassabakariet, fortel Sørvåg som starta rundturen ved dagens kyrkje.
Kyrkjebrannar
