Det var Klima- og miljødepartementet som i 2018 gav Miljødirektoratet i samarbeid med Statsforvaltarane oppdrag om å foreslå område som skal vurderast som verneverdige – både heilt nye område og utviding av allereie verna område.
Dobling av Jotunheimen
Fleire av dei råka lokale aktørane stilte seg negative til forslaga. Spesielt forslaget om å utvide Jotunheimen blei møtt med kritiske blikk.
Miljødirektoratet og Statsforvaltarane i Innlandet la fram ynskje om å utvide Jotunheimen nasjonalpark med i overkant av 1000 kvadratkilometer fordelt på kommunane Luster, Lom, Vågå, Sel, Nord-Fron, Øystre Slidre og Vang.
– Sidan vi hadde så dårleg tid foreslo vi område utan å involvere kommunane i særleg grad, fortel Harald Klæbo, seniorrådgjevar for Statssekretæren i Innlandet, til Nynorsk pressekontor.
Dette resulterte i at dei berørte kommunane reagerte på at dei ikkje fekk vere med på utarbeidingsprosessen, følte seg overkøyrde og stilte seg med det negative til forslaga.
– Kommunane ynskte å seie noko om lokal bruk av områda i ein tidleg fase. Og det har vi stor forståing for, seier Klæbo.
Prøver igjen
Difor har Statsforvaltaren byrja med blanke ark att.
– Før jul fekk vi i oppdrag frå Miljødirektoratet om å på nytt finne ut om det kan vere lokal aksept i kommunane, fortel Klæbo.
No ønskjer Statsforvaltaren i Innlandet å kartleggje meiningane blant grunneigarar, bruksinteresser, reiseliv, fjellstyre og liknande, før kommunane seier endeleg ja eller nei til aksept.
Alle råka kommunar har no takka ja til denne prosessen.
– Kommunane har veto i forhold til kva område som blir ein del av den endeleg utvidinga, sjølv om dei har gjeve samtykke til ein verneprosess, fortel Klæbo.
Lom kommune sa i fyrste omgang nei til forslaget. No har fløyta ein annan lyd.
Ordførar Bjarne Eiolf Holø sa seg glad for at det er teke lærdom av den førre prosessen, og at Statsforvaltaren og Miljødirektoratet denne gongen ynskjer å lytte til involverte partar, skriv Fjuken.
Fryktar konsekvensane
Men ikkje alle har ei like positiv innstilling. Omtrent 35 prosent av det foreslått verna arealet er privateigd og alle grunneigarane som til no er høyrde i saka er negative.
– Vi reagerer på at styresmaktene vil bestemme i eit område som vi greier å forvalte godt sjølve, seier styreleiar i Øvre Heidal sameige Harald Granrud til NRK Innlandet.
Han representerer rundt førti bønder som har bruksrettar i eitt av dei områda Statsforvaltaren ynskjer å innlemme i Jotunheimen.
Seter- og beitedrift
Øystre Slidre kommune blir òg råka av ei eventuell utviding og aktørar der er framleis svært kritiske til forslaga. Øystre Slidre fjellstyre, og politisk valt leiar Tor Skattebo, viser til at fjellområda det er snakk om allereie er godt varetekne og underlagde strenge lovverk og forvaltning.
Dei er òg bekymra for stølsdrifta og beitedrifta i området og all aktiviteten på Valdresflye, om verneforslaget går igjennom.
– Frykt for seterdrift og beite er nokså ugrunna. Det er ingen restriksjonar på beite i Noregs nasjonalparkar i dag, fortel Klæbo.
Skattebo viser òg til at ein vernestatus ikkje er nokon garanti mot utbygging. Han viser blant anna til at det er gitt løyve til oppføring av nye DNT-hyttar etter at Langsua nasjonalpark vart oppretta, skriv Avisa Valdres.
– Ved at det blir eit verna område har vi ein mykje sterkare heimel til å styre ferdselen enn om det ikkje er vern. Ein kan seie nei til merking av stigar og utbygging av hytter, meiner Klæbo.
Jakt og fiske
Øystre Slidre jeger- og fiskeforeining er òg blant foreiningane som er kritiske:
Vi støttar ikkje supplerande vern, som på noko vis hindrar eller byråkratiserer våre medlemmer sine moglegheiter og rettar til utøving av jakt og fiske i Øystre Slidre kommune. [ …]», skriv foreininga i høyringssvaret sitt ifølgje Avisa Valdres.
Klæbo forstår ikkje kvifor auka naturvern skal forhindre jakt og fiske, då det står i alle verneforskrifter at jakt og fiske kan utøvast etter gjeldande lovverk.
– Bruksrettar etter fjellova kan i hovudsak vidareførast i nasjonalparken. Dette gjeld jakt, setring, fiske, reindrift og beite, fortel han.
Formålet med utvida vern:
* Sikre inngrepsfrie naturområde for ettertida etter naturmangfaldlova – sikrare vern i forhold til plan- og bygningslova
* Få med natur som svarer til dagens verneformål for Jotunheimen NP
* Få med eit vidare spekter av naturtypar innanfor vernet (frå høgfjell til dalbotn)
* Vern av raudlista naturtypar og raudlisteartar (ikkje systematisk kartlagt)
* Sikring av områda for dagens bruk; friluftsliv, jakt, fiske, beite, reindrift
Kjelde: Statsforvaltaren i Innlandet
Foreslåtte utvidingar av eksisterande nasjonalparkar:
* Utviding Raisduottarhaldi landskapsvernområde
* Utviding av Rohkunborri nasjonalpark
* Utviding Reisa nasjonalpark
* Utvidingar Ånderdalen nasjonalpark
* Utviding Forollhogna nasjonalpark i Tynset kommune
* Utviding av Dovre nasjonalpark i Dovre kommune
* Utviding av Jotunheimen nasjonalpark mot Bygdin og Tyin
* Utviding av Jotunheimen nasjonalpark mot Langsua
* Utviding av Jotunheimen nasjonalpark mot Fannaråken og Hurrungane
* Utvidingar av Jotunheimen nasjonalpark i Lom
* Utviding av Jotunheimen nasjonalpark mot Sjodalen vest med Hindflyene
* Utviding av Jotunheimen nasjonalpark mot Valdresflya inkl. Leirungsdalen
* Utviding av Jostedalsbreen nasjonalpark, Svartebotnen
* Utviding Blåfjella-Skjækerfjella nasjonalpark i Lierne kommune
* Utviding av Raet nasjonalpark med Kvakenes i Arendal kommune
* Utviding av Femundsmarka nasjonalpark
* Utviding av Skarvan og Roltdalen nasjonalpark
Kjelde: Miljødirektoratet.
