Fart og moro for store og små i Sjoargata
Barneløp, klovnerier, bilutstilling, mannekengoppvisning, fotballtriksing i verdsklasse, aktivitetar for barn og ulike salsboder lokka folk i hopetal til Sjoargata i Ølen sentrum. For 9 år gamle Simon Fielding frå Ølen blei dagen ekstra spennande med trikseskule og Sjoarløp.
På kaien i Ølen står ein gjeng fotballinteresserte gutar og jenter med kvar sin fotball. Dei har nettopp fått med seg trikseshowet til fotballtriksaren Sindre Herre Hansen, og nå er dei klar til å læra eit triks og to av den kjente triksestjerna frå Voss som deltek på meisterskap over heile verda. Nyleg sikra 22-åringen seg ein tredjeplass under VM i fotballtriksing i Tsjekkia og i dag har han tatt fotballen med seg til Ølen for å visa fram sporten og la ungane få prøva seg. 9 år gamle Simon Fielding og kameraten Nikolai Vestbø (9) har begge meldt seg på trikseskulen for å læra å handtera ballen. Ikkje alt er like lett, men dei med litt øving får dei snart taket på det.
— Me har lært mange triks. Men det er litt vanskeleg . Me såg showet og han var veldig flink. Det var veldig kjekt å få treffa han, seier dei to 9-åringane og får skryt av meisteren sjølv.
— Det er kjekt å få vist fram sporten. Ungane var flinke, seier Hansen.
