Gler seg til ny jobb. Som einingsleiar er Hilde Bjelland Abelseth sjef for både skulen og barnehagen på Imsland.
Foto: Privat
Gler seg til skulestart i ny rolle
Etter vel 20 år som lærar i Imsland, inntar Hilde Bjelland Abelseth rolla som sjef på skulen og barnehagen. Det er ikkje berre dei fire førsteklassingane som får ei spesiell oppleving i dag.
— Eg gler meg stort til denne dagen. Det er spennande med ei ny rolle sjølv om eg kjenner barn, elevar, kollegaar, organisasjonen og systemet godt, seier den ferske einingsleiaren ved Imsland skule og barnehage. 23 elevar og ni små i barnehagen er ansvaret som venter i stillinga.
Første skuledag startar ute med flaggheising, song og ein enkel seremoni for å markera at eit nytt skuleår er i gang. Hilde er godt førebudd etter fleire dagar på kontoret og møte med kollegaer og kommunal organisasjon, men er audmjuk i forhold til den viktige jobben som ventar.
— Og så blir det jo litt rørande å ta imot dei ferske elevane og alle dei andre som er knytte til skulen og barnehagen. Dette blir kjekt, seier Hilde.
