Rundt 50 personar møtte fram då NVE hadde synfaring til Strypeheia i Etne juni i fjor.
Arkivfoto: Grethe Hopland Ravn
Vil visa fram naturperla til politikarane
Grethe Tesdal og Odd Neraal har invitert toppolitikarane til fjells for å ta Strypeheia i nærare augesyn før marknadsdebatten om kraft går i gang. — Me vil dei skal sjå med eigne auge kva me snakkar om, seier duoen.
Om vêret tillet det har duoen frå Forum for jord og sjøkabel planar om å invitera med både toppolitikarar, fylkes- og lokalpolitikarar, og bygdefolk til Strypeheia før kraftdebatten går i gang i kinosalen på Skakke, fredag ettermiddag.
— Me har lyst til at dei som ikkje kjenner til gulløypa vår, skal få sjå kor flott det er med den urørte naturen der oppe. Eg trur det vil gjera større inntrykk enn å få forklart det i kinosalen, seier Tesdal.
Ho er ganske stolt over at så mange politikarar frå både fylke og Stortinget har takka ja til å bli med på turen som startar ved tinghuset i Etne fredag føremiddag, der forumet har leigd ein 40-setars buss som går nesten heilt opp til Skarstøl og gjennom bommen.
