Einar Haugen i Etne fekk Mattilsynet uventa på døra i juni i fjor. Han fekk ingen merknader.
Foto: Irene Mæland Haraldsen
Halvparten har manglar i tilsyn hos grisebønder
I ein toårs periode har Mattilsynet banka på dørene til grisebønder over heile landet for å sjekka at alt står bra til med dyra. Svinebonde Einar Haugen i Etne var blant bøndene som hadde alt på stell då han fekk uventa besøk.
Mattilsynet gjennomførte i 2021 og 2022 inspeksjon i 582 svinebesetningar over heile landet. Resultatet er samla i ein rapport som nyleg blei publisert. Ved rundt halvparten av besetningane er det avdekka eitt eller fleire regelbrot av ulik grad. For grisebonde Einar Haugen i Etne som fekk uventa besøk av Mattilsynet i juni i fjor, viste resultatet av inspeksjonen ingen avvik.
— Dei kom på uanmeldt besøk og sjekka at grisene har det godt, seier Haugen som driv formeiringsbesetning.
Han er opptatt av at dyra skal ha det godt og kjenner ikkje til bønder som driv uforsvarleg. Å ha dyr som trivst og har god helse er avgjerande for ei god drift. God dyrevelferd betyr pengar i kassen.
