Maren Skrunes prøver å komme seg unna Ida Pettersen og resten av forsvarsmuren.
Foto: Svein-Erik LarsenFOTO: Svein-Erik Larsen
Handballen vaknar til live
For første gong sidan koronapandemien skal Ølen IL sitt kvinnelag vere med i seriespel i handball. Maren Skrunes (30) og resten av den store treningsgruppa ser fram til å spele kampar igjen.
For Eline Hundhammer Siglen (22) sin del er det første gongen på fire år at ho speler handball.
— Det er kjempekjekt at me skal spele kampar igjen, seier Hundhammer Siglen.
Ho fekk æra av å avgjere den avsluttande kampen på treninga med å sette inn siste målet vinn»-scoringa
Godt oppmøte
Laget spelar sin første seriekamp borte mot Avaldsnes i Håvik Idrettshall 8. januar. Halve seriesesongen i 5. divisjon er allereie spelt, så det set grenser for kor høgt Ølen kan ende på tabellen.
— Me har spelt to treningskampar og er spente på nivået, fortel trenar Rolf Granli Gangdal.
Dei starta opp med treningar i august og har hatt eit snitt på rundt 14 spelarar på trening. På det meste har 20 spelarar vore med. Aldersspennet har vore frå 36 år til nokre J15-spelarar som har vore med på enkelte treningar.
— Eg er veldig fornøgd med oppmøtet, seier trenaren.
Totalt 14 spelarar er registrert til seriespel så langt. Gangdal håpar at det blir eit par til før avkast. Spelarane kjem i frå alt frå Skånevik til Lundeneset.
Trivsel viktigast
Grunna litt sjukdom i dei seinare vekene var det lenge litt usikkert om det blei trening denne siste tysdagen før jul, men då kvelden kom, var elleve jenter på plass i Ølen idrettshall. Treninga starta med ei kjapp fotballøkt som oppvarming, før dei gjekk over til kastøvingar. Det var musikk og lett og ledig stemning gjennom dei første øvingane.
— Regel nummer éin er at me skal ha det kjekt. Eg likar å sjå smil, fortel Granli Gangdal.
Han har erfaring som spelar på Stord før han flytta til Ølen og blei trenar for første gong i 2001. Då trena han aldersbestemte lag i eit par år. Sidan har det vore av og på med treneroppdrag med alt frå handball for dei minste, til kvinnelaget. Gjennom treninga gav han klare instruksjonar, spesielt i øvingane der dei spelte forsvar mot angrep.
— Me har spelarar på ulike nivå som alle skal føle at dei får ei lita utfordring på trening, seier Granli Gangdal.
Ei av dei som er i den øvre delen nivåmessig, er Astrid Haugland Gundersen (22). På treninga klarte ho å komme seg forbi resten av gjengen og score i skotøvinga der alle som bomma, blei ein del av forsvarsmuren. Ho har tidlegare spelt i 3.divisjon med Åkra.
— Det kjennest heilt fantastisk å ha lag i Ølen igjen. Me har venta på dette sidan korona, fortel Haugland Gundersen.
