Første spadestikk for ny kraftlinje
Bygging av ei ny 36 kilometer lang kraftlinje i Vindafjord og Tysvær er i gang. Onsdag kunne leiinga i Haugaland Kraft, Fagne og entreprenørselskapet Kraftmontasje saman med representantar frå Norconsult markera byggestart for første del den nye kraftlinja med start like ved Ølen transformatorstasjon. For direktør i Fagne var dette ein etterlengta dag.
— Me treng linja for å få kraft ut av dalen. Mykje av linjenettet er bygd på 60-talet så dette er modent for utskifting, seier direktør i Fagne, Ingrid Therese Tjøsvold og er glad for at arbeidet er i gang.
Den nye linja vil i hovudsak gå langs eksisterande trase med unntak av enkelte område. Totalt skal det byggjast 141 nye master i stål som erstatning for dagens 437 master i tre og betong. Byggeprosjektet er delt inn i to, der dei 39 første mastene er venta å vera på plass neste sommar, medan heile linja er venta å stå ferdig i 2027.
