Drama frå Håland

Det er bokstaveleg talt duka for drama når NRK Hordaland sender ut ei vegmelding om eit stort steinras på Håland i Etne. Mesta må rykka ut for å rydda opp, og midt i arbeidet kjem dei over nokre mystiske runar som er skribla inn i fjellet. Fleire prøver å tyda det som står, men berre ein av arbeidarane klarar det. På magisk vis blir setninga som ei trylleregle, og ein gjeng med vikingar frå vikingtida blir kasta fram i tid og kjem ut frå fjellet. Vikingane er på leit etter den andre bronseringen som skal brukast som hovudpynt i eit bryllaup, og kjem i prat med Steinar, Rullestein og Steinar-Arnulf som er Mesta-tilsette. I eit slepphendt augeblikk røper dei at bronseringen ligg på utstilling på tinghuset i Etne, og dramaet som onsdag skal utspelast på scenen i Skakke kulturhus, er eit faktum.

Kulturkveld

Det er valfaglinja sal og scene som står for både skodespelet og musikken i det som skal bli ei heilaftans førestilling. I tillegg skal også kulturskulen vera med på programmet, og her vil skulekorps frå både Etne, Skjold og Skånevik bidra, i tillegg til band som har brukt siste tida til å øva saman. Det blir også utstilling av måleri og teikningar frå kulturskuleelevar i foajeen, og kulturskuleleiar Torbjørn Tveita Reiso trur dette blir ein knallkveld.