Geolog Håvard Stubseid (t.v.), ordførar Mette Heidi Bergsvåg Ekrheim, geolog Sarah Gatley frå Irland, geolog Melanie Border frå England, arkeologprofessor Knut Andreas Bergsvik og dagleg leiar i Geopark Sunnhordland, Brynjar Stautland kikkar på Helgaberget på Stødle.
Arkivfoto: Grethe Hopland Ravn
Geoparkar tilbake på statsbudsjettet
Dagleg leiar i Geopark Sunnhordland, Brynjar Statuland, kan opplysa at globale geoparkar nå er tilbake på statsbudsjettet. Det kan bety mykje for Sunnhordland.
I revidert statsbudsjett som blei lagt fram denne veka, blei det vedteke eit driftstilskot på éin million kroner til kvar av dei fire geoparkane i Noreg som har UNESCO Global Geopark-status. Sunnhordland Geopark er ein av dei, i saman med Norvegica Geopark, Magma Geopark og Trollfjell Geopark.
For Geopark Sunnhordland gjer dette dei i stand til å kunne tilsetja ein geolog i selskapet sitt, slik UNESCO-statusen krev.
— Dette er svært gledeleg, og styrkar Geopark Sunnhordland vesentleg i den store formidlingsoppgåva som geoparken har overfor reiselivsnæringa og skuleverket i heile Sunnhordland, seier Brynjar Statutland.
