Stor dugnadsvilje for utebasseng

Tre dagar i veka er det duka for dugnad på området der det nye utebassenget i Skånevik er under oppføring. Mange av arbeidsoppgåver som ikkje krev fagfolk blir utført av frivillige hender, og til kvar dugnadsøkt stiller folk villig opp for å bidra der dei kan. Riving av forskaling, reingjering, rydding, utvendig snikkararbeid, graving, isolering og maling er oppgåver dugnadsgjengen villig tek fatt på, og dei ivrigaste stiller opp på nesten kvar einaste gong der er arbeid som skal gjerast.

— Alle bidreg litt. Me er med når det trengst, seier Magne Tendal og finn fram ei isolasjonsplate som skal festast på dei solide bassengveggene.

Denne dugnadslaurdagen har han saman med Øyvind Molnes og Steffen Vinje tatt på seg jobben med utvendig isolering av bassenget, og i tillegg til ei handfull andre arbeidsvillige karar og eit par damer har han sett av store deler av dagen til frivillig bygningsarbeid.