Varaordførar Kenneth Karlsen (Frp) i Etne kommune.
ARKIVFOTO: TORSTEIN TYSVÆR NYMOEN
Kraftlinja
Etne kommune møtte departementet: — Tok til seg alvoret i saka
Kommunedirektør Filippo Ballarin og varaordførar Kenneth Karlsen (Frp) i Etne møtte fredag leiinga i olje- og energidepartementet, i eit siste forsøk på å påverke trasévalet for den omstridde kraftlinja mellom Blåfalli og Gismarvik.
— No har me snudd kvar stein i denne saka, seier Kenneth Karlsen etter det i underkant av ein time lange Teams-møtet som Etne kommune og Olje- og energidepartementet hadde fredag.
I møtet presenterte kommunedirektøren og varaordføraren mellom anna historikken i Etne kommune si handsaming av saka gjennom tre høyringsrundar, heilt frå saka kom på bordet første gong for seks år sidan.
— Me peikte på dei innspela me har gitt og spørsmåla me har stilt gjennom dei tre høyringsrundane, fortel Karlsen.
