Gustav Løge Fosse (KrF f.v.), Ole Johan Vierdal (Sp) og Øyvind Valen (Ap) skal styre Vindafjord kommune dei neste fire åra.
Foto: Svein-Erik Larsen
Kommuneval 2023
Formannskapsplass sikra avtale
Sp, Ap og KrF dannar ordførarkoalisjon i Vindafjord dei neste fire åra, slikt dei har gjort i denne perioden. Plass i formannskapet var avgjerande for at Ap haldt seg til koalisjonen.
— Formannskapsplass var kravet vårt i forhandlingane, fortel Wenche S. Lilleland (Ap).
Like før klokka 20.50 tysdag kveld informerte Ole Johan Vierdal (Sp) resten av politikarane på rådhuset i Ølen om at han har komme til semje med KrF og AP og har fleirtal til ein ny periode som ordførar. Gustav Løge Fosse (KrF) held fram som varaordførar.
— Me har ein avtale om ordførar, varaordførar og formannskap, samt at me skal bli einige om budsjett og kommuneplan, opplyser Vierdal.
